قريت هذا الموضوع في جريدة وعجبني نظرة الشخص للمنتديات وعدلت فيه وحبيت اطرحه


المنتدى ولا الي يستوي في المنتدى؟
قال محدثي : إيش رايك في المنتديات ؟
قلت : المنتديات ولاّ اللي يستوي في المنتديات ؟
قال : خلّيهم الإثنين ، وعطني رايك في كلّ وحده بشكل منفصل عن الثانيه .
قلت : تمّ .
قال : وانا اسمع .
قلت : بالنسبه للمنتديات هيّه ضروريّه ، ومهمّه في نفس الوقت ، مساحه مفتوحه ولكن تحت السيطره ، فيها مرونه ولكن في نفس الوقت فيها حزم ، يعني ممكن تكون سلاح ذو حدّين ، لكن ، بطريقه امسك العصا من النصّ ، تصير التوجّهات فيها مدروسه .
قال : ما فهمت قصدك بالمرونه .
قلت : خلّينا صريحين شويّ ، المنتديات فيها كلّ شيّ ، غثّ وسمين ، صحّ وخطأ ، حقّ وباطل ، صراحه وغموض ، وقليل ما تلقى حدّ يكتب أو يشارك بمعرّف صريح ، الكل لهم أسماء مستعاره لأسباب مختلفه .
قال : تمام ، هاذي فاهمنها .
قلت : الجانب المهمّ في المنتديات ، انّها تخلّيك مطّلع على كلّ التوجّهات ، وراصد لكل أنواع التحليلات الموجوده ، ومستفيد في معرفة مختلف الشرائح والأعمار وتوجّهاتها ، وهذا في غالب الأحيان بتفهمه من طبيعة اللغه المكتوبه فيها المواضيع والردود ، وبتفهمه من ظروف طرح المواضيع ، وبتفهمه من مقارنات بين الواقع الموجود فيه الحدث وطريقة طرحه ، وفي نفس الوقت تقدر تاخذ المفيد وتترك غير المفيد ، ما دام انّه ما يمسّ أشخاص بعينهم .
قال : هاذي عرفناها ، خبّرني ألحين عن اللي يستوي في المنتديات .
قلت : والله أشياء كثيره .
قال : عطني مثال أو أمثله ، اللي انته تشوفه ، المهمّ توصّل لي المعلومه .
قلت : فيه أشخاص كثيرين ، من الجنسين ، فيه ناس فاهمين ، وفيه ناس داشّين عرض ، وفيه ناس لهم أغراض ، وفيه ناس تصطاد في الماي العكر ، وفيه ناس لا لهم لا في العير ولا في النفير ، وفيه ناس مدفوعين أو مأجورين ، وفيه ناس ما مكانهم المنتديات أصلا ، وفيه ناس تتسلّى ، وفيه ناس جادّين وعندهم قضايا جادّه ، وزيد من عندك اللي تريده .
قال : هذا معناه انّ هامش الاستفاده الموضوعيّه قليل .
قلت : لا ، لا تحكم بهاذي السهوله ، نحن في البلد عندنا منتديات مختلفه ، رياضيه وسياسيه واقتصاديّه ومنوعه وفنّيّه وغيرها ، ولكن ، انته بوجود هاذي المنتديات ، تخدم المشرّع والبلد بطرق مختلفه .
قال : مثل .
قلت : مثل انّك تقدّم راي الناس في حدث معيّن ، بتلقى ناس غاضبه ، وناس ساخره ، وناس ما عارفه عن الموضوع شيّ لكن تشارك ، وناس عندها راي منطقي ، وناس أكاديميه وعندها رأي علمي ، وناس تكتب راي غيرها بإيعاز مباشر من أطراف ثانيه ، وناس هدفها تكسر مياديف بشر معيّنين من وراء أحداث معيّنه .
قال : طيّب إيش يستفيد المشرّع من هذا كلّه ؟
قلت : أوّل شيّ بيتعرّف على المشكله ونوعها وحجمها .
قال : تمام .
قلت : ثانيا ، المشرّع بيتعرف على توجّهات الناس ، وهذا يشبه الرأي العامّ في الجديد والقديم والمستجدّ .
قال : أوكيه .
قلت : يعني المشرّع بيتعرف على طبيعة الحوار والمداخلات والمشاركات من خلال الناس اللي تناقش الموضوعات ، والناس ترا همّه اللي اللي يحددوا هويّة المنتدى ، وإذا كان صريح أو مجرد باحث عن الشهره ، أو انّه يريد يتجاوز المحظور .
قال : سبحان الله .
قلت : بعدين الناس اللي في المنتديات ثقافتهم مختلفه ، ومن ثقافتهم تقدر تعرف توجّهاتهم ، يعني بصريح العباره ، المنتديات عالم فيه المتناقضات ، لكن خذ منّه اللي يفيدك ، واترك اللي ما لك شغل فيه واتق الله في نفسك

((المنتديات عالم فيه المتناقضات ، لكن خذ منّه اللي يفيدك ، واترك اللي ما لك شغل فيه واتق الله في نفسك ))

بالمختصر المفيد هذا المطلوبـ !!

أشكركـ ..

تسلم اخي ع الموضوع الرائع الذي يطرح احد القضايا المهمة


لها ايجابيات ولكن سلباتها اكثر
وكل هذه السلبيات ناتجه عن جهل مستخدمها باهميتها
وكما قلت اخي((( المنتديات عالم فيه المتناقضات ، لكن خذ منّه اللي يفيدك ، واترك اللي ما لك شغل فيه واتق الله في نفسك)))
تشكرات

اشكر الجميع على المرور وصحيح انه سلبيات المنتدى اكثر من ايجابياتة لكن بصراحة انا شف منتديات يكاد تكون سلبياتها قليلة ما تذكر وفيها اشيا كثيرة مفيدة وكما قلتو المستخدم الي يحدد

وعاد اذا حد عنده اراء مايبخل علينا

عدنااا
طبعا كل واحد له رايه الشخص في المنتديات .. ايجابيات وسلبيات المنتديات تتفاوت بين كل المنتديات _بمعنى ان العوامل المحيطه بالمنتدى هي اللي تحكم_او بالأخص هو اعضاء المنتدى وتفكيرهم !

هذا تفكيره كذا وهذا تفكيره كذا _ بس الأهم هو العباره اللي قلتها _المنتدى فيه عالم المتناقضات_فمن المستحيل تحصل منتدى بدون متناقضات بس علينا اختيار الإيجابي وترك السلبي أو محاولة تعديل السلبي
ثانكس راعي بلادي ع المواضيع الكشخه اللي جالس تتحفنا بها كل مره
لا حرمنا الله ابداعك
تقبل مروري واحترامي

طرح موفق
تسلم

احم احم
شي حلو
وياليت الي راديني يعرفو شو كتبو وينفذو
وهذي ما بعيده منهم

شكرا للجميع
وبالاخص لحمامتنا المتالقه دوما.....

مشكورين على المرور

واهم حاجة انه الفكرة وصلت للجميع

العاقل طبيب نفسه ..

كل شي له حدين

وكل واحد ياخذ الزين ويترك االشين..